هات ودنك..كلام بينى و بينك

كل ما باكبر أكيد فى حاجات ف حياتى بتزيد و حاجات بردو أكيد بتقل

ممكن نتخيل ان كل حاجة ممكن تزيد و تقل إلا حاجة واحده عمالة تزيد على طول



احساسى بالوحده



كل ما بكبر بيزيد احساسى بالوحده بطريقة فظيعة

ساعات أه بحس انها حاجة عاديه على أساس انى متعودتش أو متربيتش انى اختلط بالناس كتير

بس ساعات أكتر بحس انها حاجة وحشه و انى لازم اتصرف عشان مبقاش كده

أكيد مش حاجة حلوة انك تبقى وحيد ولا حاجة حلوة انك تعمل كل حاجة لوحدك أو ع الأقل تعملها مع حد بس مش بتحبه



كتير حاولت انى اعرف ناس و أخلى علاقتى بيهم بجد سواء بنات أو ولاد من صحابنا ف الكليه و بكرر انهم كانوا من صحابنا ف الكليه بس كل مرة بتحصل حاجة غريبة أوى.. كل مرة أقطع أكتر من نص المسافه و أتعرف عليهم بجد و نبدأ نبقى أصحاب و بعدين الموضوع يقف عند كده.. ألاقى حاجة جوايا بتقول لأ محدش يقرب أكتر من كده.أكتر من كده مينفعش.. حتى لو كانت صديقة بنت..حاجة صعبه مش كده؟؟



أنا اللى أعرفهم بجد و بجد دى يعنى أعرف أهلهم و اخواتهم و حياتهم بالتفصيل 4 بنات أصحابى من ابتدائى و اعدادى.. غير كده أعرف ناس و منهم قريبين كمان بس بردوا يتعدوا..و بردو فى حدود بينى و بينهم أكتر من أى حدود انتو تتخيلوها.



الموضوع ده توقعت انه حيقل لما أدخل كليه.. بس بالعكس ده زاد أكتر و وصل لدرجة غريبة أنا مكونتش اتوقعها ف يوم من الأيام.. عندى ناس على فيس بوك اصحابى أعرف اسمهم و مش أعرفهم ف الحقيقة و الأحلى من كده انهم معايا ف الكليه و ف نفس السيكشن و كمان معايا ف نفس المعمل.. ممكن أقابلهم؟؟ اه.. ممكن أتعرف عليهم؟؟ اه.. ساهل بس بعد كده؟؟



أنا وصلت لفكرة و مش قادرة أتخيل انها صح أو انها تطلع مظبوطة

أنا وصلت انى ممكن أتعرف على ناس كتير بس من بعيد و كل ما أحاول أتقرب منهم أو همه يقربوا منى حاجة من جوايا تقول سيبونى لوحدى.. و كأن فى حدود مينفعش أى حد يقرب منها غير صحابى بتوع زمان ال 4 اللى حكيت عنهم ف الأول..

عارفين؟؟ حتى الأربعة دول بردو فى بينى و بينهم حدود.. هيه اه تكاد تكون معدومة بس فى مقدرش اقول مفيش



كان طول عمرى بيتهيألى انى لما حابقى ف كليه حيبقى عندى اصحاب كتير أوى و كا ما أمشى ف حته حاسلم و اقف اتكلم و كده. بس حاليا ده مش بيحصل.. و كتير أوى باقضى وقتى ف الكليه مع ناس مش برتاح معاهم و كل ده عشان همه اصحابى من ثانوى و صدفة انهم معايا ف نفس الكليه أو عشان بيكونو همه الشخصية الوحيده اللى أعرفها هناك.



مقدرش أنكر انى عندى أصحاب كتير من النت و دول باقضى معاهم وقت كبير أوى يمكن أكبر من اللى بقضيه مع أصحابى.. و فى منهم ناس قريبة بجد ليا.. بس بردو بارجع لنفس النقطة...نيجى نتكلم ف مرحلة بعد كده تلاقينى تلقائى كده أعمل أى حركة أبوظ بيها كل اللى عملته.و ده طبعا بيزعل ناس كتير أوى و عمرى ما كنت أقصد أو أتعمد أعمل كده.



عادى يعنى... بردو لسه بتخيل انى لما أخلص و اشتغل حيكون عندى أصحاب و زمايل كتير.. ان شاء الله حيكون عندى كتير و حكون أنا كمان بطلت كده.





صحيح..هو أنا ليه كده؟؟؟


_________________